SGS skoðun á Íslandi

 Hákon Jóhannesson matvælafræðingur hefur verið umboðsmaður fyrir SGS Danmark A/S hér síðan 1989 og unnið í nánu samstarfi við þá.

Société Générale de Surveillance www.sgs.com er stærsta skoðunarstofan á sínu sviði með starfssemi í yfir 140 löndum. SGS getur því veitt þér skoðunarþjónustu nánast hvar og hvenær sem er. SGS gegnir í dag veigamiklu hlutverki í millilandaviðskiptum, sem faglegir, hlutlausir skoðunar- og úttektaraðilar. 

SGS hefur nú veitt skoðunarþjónustu hér á Íslandi á þriðja áratug. Meginstarfið hefur verið í tengslum við skoðun fiskafurða s.s. fiskimjöls og þurrkaðra fiskafurða auk ýmissa iðnaðarvara og þá yfirleitt á vegum kaupanda. Við höfum einnig annast ýmis sérverkefni

Fiskafurðir skipa stóran sett í útflutningi frá Íslandi. Gæði vörunnar og heilnæmi skiptir miklu máli í tengslum við það verð sem fæst fyrir hana og hefur verulega að segja með að fá endurteknar pantanir og þá viðskiptavild sem tryggir vöxt og viðgang viðskiptanna.

Við viljum nú útvíkka þá þjónustu sem við innum af hendi hérlendis og nýta til hins ýtrasta þá sérfræðiþekkingu sem við höfum á gæða- og hollustumálum fiskvinnslunnar og aðstöðu sem við höfum yfir að búa, til hagsbóta fyrir útflytjendur.

Viðskipti snúast oft um verð vöru og gæði. Ýmsar spurningar vakna hjá kaupanda og seljanda í tengslum við viðskiptin sem varða gæða- og hollustumál vörunnar: Hver eru gæði hennar og stenst hún umræddar kröfur? Hvaða aðgerðir eru í gangi við framleiðslu til þess að stýra gæðum og til að tryggja hollustu afurðarinnar? Er varan alltaf eins eða er hún breytileg frá einni sendingu til annarar? Hver leggur mat á gæði vörunnar? Hvaða aðferðum er beitt við sýnatökur? Hvernig er unnið úr mæligildum sýna/skoðana? Gefa lokaniðurstöður skoðunar rétta og trúverðuga mynd af raunverulegu ástandi afurðarinnar?

Á tímum nútíma gæðastjórnunar er framleiðanda gert að byggja gæði og heilnæmi afurðar inn í framleiðsluna með skipulögðum aðgerðum s.s. markvissu innra eftirliti sem byggir á aðferðafræði HACCP gæðakerfisins, en treysta ekki eingöngu á lokaskoðun.

Lokaskoðun er þó oft nauðsynleg í viðskiptum, þegar vara skiptir um hendur - og sé hún framkvæmd verður hún að vera unnin markvisst og af þekkingu. Vanda verður til sýnataka, mælinga sýna, úrvinnslu mæligilda og túlkun þeirra, því að megintilgangur lokaskoðunar er oft að leggja mat á stóra sendingu með tiltölulega litlu sýnaúrtaki.

SGS sérhæfir sig í slíkum úttektum og hvers kyns gæðamati og fara hér á eftir nokkrir þjónustuliðir sem SGS skoðun annast hév á landi. 

Skoðun á ástandi vörusendingar: Lokaskoðun

Framkvæmd: Staðfesting á þyngd eininga, heildarþyngd, fjölda eininga í sendingu og merkingum. Vinna okkar s.s. varðandi sýnatöku, úrvinnslu mæligilda og túlkun þeirra byggir alltaf á aðferðum sem hafa tölfræðilegan grunn til þess að hægt sé að fá trúverðuga mynd af raunverulegu ástandi sendingarinnar.

Markmið: Að meta hvort sending uppfyllir umsamdar kröfur kaupsamnings s.s. magn og gæði (ýmsir eiginleikar; hollustuþættir).

Niðurstöður: Skoðun getur leitt til þess að vörusendingu sé hafnað, eða að hún fari í flokkun. Loks má færa vöruna í annan verðflokk skv. samkomulagi við kaupanda. Kaupandinn fær þó þá vöru sem hann greiðir fyrir.

Skoðun á innra eftirliti vinnsluaðila

Í vissum tilfellum getur verið nauðsynlegt fyrir útflutningsaðila að fá faglegt mat á aðstöðu og framleiðsluháttum sinna birgja. Við getum tekið út fiskvinnslustöðvar, hvort sem um einstakar skoðanir er að ræða eða með reglulegu millibili. T.a.m.: 

Virkni innra eftirlits: Úttektir á virkni innra eftirlits framleiðanda með það fyrir augum að leggja mat á virkni HACCP gæðakerfisins og hvort hreinlætisáætlunum sé fylgt. Innra eftirlit og hreinlætisáætlanir sem settar hafa verið upp, en eru ekki starfræktar gefa falskt öryggi fyrir seljanda afurðar og kaupanda. 

Hverskyns skoðanir og mælingar á vettvangi

Oft geta fyrirvarlausar sýnatökur, mælingar eða skoðanir gefið góða yfirsýn yfir aðstæður, gæði eða hollustuhætti afurða. 

Skoðanir vegna þess að kaupandi biður um að SGS yfirfari tiltekna vörusendingu.

Hluti af vinnu SGS skoðunar er vegna beiðni kaupanda eða yfirvalda viðkomandi lands um skoðun. Ýmis lönd hafa gert samning við SGS um slíka skoðunarþjónustu s.s. Angóla, Argentína (hluti), Kamerún, Eþíópía, Filippseyjar , Haiti , Perú, Rússland, Tansanía. Skoðun getur falið í sér m.a. staðfestingu á vörugæðum og einingafjölda í gám, sýnatöku og umsjón greininga og umbúðamerkingar.

Allri vinnu lýkur með skýrslu og ef á þarf að halda, vottorði á erlendu tungumáli ef það þarf að leggja niðurstöðurnar fyrir erlenda aðila.

Loks viljum við undirstika það að hér hafa aðeins verið nefnd nokkur dæmi um það hvernig SGS skoðun getur liðsinnt ykkur. Möguleikar SGS eru ótal margir bæði hérlendis og erlendis.

Hér má lesa viðskiptaskilmála SGS. (SGS General Conditions of Services).

Leitaðu upplýsinga

Hafðu samband ef þú óskar frekari upplýsinga eða vilt fá tilboð vegna þjónustu.